Жыл басынан бері Қазақстанда есірткі сатқан 440 сайт анықталып, бұғаттауға жіберілді. Бұл туралы ІІМ Есірткі қылмысына қарсы іс-қимыл департаментінің басқарма басшысы Бақытжан Әмірханов айтты, деп хабарлайды inbusiness.kz порталы "Интерфакс-Қазақстан" ақпарат агенттігіне сілтеме жасап.
Оның айтуынша, интернетте есірткі сату дерегін анықтау үшін "Кибернадзор" ақпараттық жүйесі іске қосылған.
"...Жыл басынан бері Ақпарат және қоғамдық даму министрлігіне 440 интернет-ресурс, оның ішінде 150-ден аса Telegram-канал анықталып, бұғаттауға жіберілді", – деді Бақытжан Әмірханов.
Сондай-ақ ол биыл елдегі танымал порталдардың бірінде 50-ден аса хабарландыру алынып тасталғанын атап өтті. Ондағы жұмыс курьер деп жазылғанымен жұмыс іздеген адамға есірткі тасымалдау ұсынылған.
2022 жылғы қаңтар-ақпанда Ішкі істер органдары 378 есірткі қылмысын анықтаған. Оның ішінде 248 дерек есірткі сату, 85 дерек аса ірі көлемде есірткі сақтаумен байланысты.
"Жыл басынан бері 7 есірткі зертханасы жойылды. Барлығы 422 келі есірткі тәркіленді. Оның ішінде 196 келі гашиши, 213 келі марихуана, шамамен 40 келі синтетикалық есірткі", – деді басқарма басшысы.
