"Нұрлы жер" мемлекеттік бағдарламасы шеңберінде Маңғыстау облысында 9500 тұрғын үй салынады, деп Индустрия және инфрақұрылымдық даму министрлігінің баспасөз қызметі хабарлады.
"Маңғыстау облысында биыл қаржыландырудың барлық көзі есебінен 1 071 мың шаршы метр немесе 9500 тұрғын үй салу міндеті тұр", деп жазылған хабарламада.
Биылғы жылдың І тоқсанында салаға 22,4 млрд теңге инвестиция бағытталған. Бұл - өткен жылдың сәйкес кезеңімен салыстырғанда 3%-ға жоғары. Осы кезеңде жалпы ауданы 349,4 мың шаршы метр болатын 2422 тұрғын үй пайдалануға берілмек. Оның ішінде, 1594 жеке үй бар.
Жалпы биыл "Нұрлы жер" мемлекеттік бағдарламасы шеңберінде Маңғыстау облысында инженерлік-коммуникациялық инфрақұрылым және тұрғын үй құрылысына 15,1 млрд теңгеге 19 жоба іске асырылып, 973 адам жұмыспен қамтылмақ.
Құралай Құдайберген
