2018 жылдың тоғыз айының қорытындысы бойынша өнеркәсіп өндірісі 104,8% құрады, оның ішінде тау-кен өнеркәсібі — 104,9%, өңдеу өнеркәсібі — 105,1% болды. Еліміздің 14 өңірінде өнеркәсіп өндірісінің көлемі өскен. Бұл туралы ҚР инвестициялар және даму бірінші вице-министрі Роман Скляр үкімет отырысында айтты, деп хабарлайды primeminister.kz.
Өңдеу өнеркәсібінде жылдық жоспарланған көрсеткіштерге қол жеткізілді және бірқатар салаларда өсім байқалуда. Атап айтқанда, машина жасау саласында 14,5%, химия өнеркәсібінде 8,2%-ға, жиһаз өндіруде 5,1%, қағаз шығаруда 9,2 %-ға, резеңке және пластмасса бұйымдарын өндіруде 2,3%-ға өсім байқалған. Сонымен қатар, көлік кешені бойынша тоғыз айдың қорытындысы бойынша нақты көлем индексі 104,6% құрады. Тұрғын үй құрылысы бойынша 8,8 млн шаршы метр тұрғын үй пайдалануға берілді.
"Жалпы республика бойынша 77 099 бірлік баспана пайдалануға берілді, оның ішінде 30 383 – жеке тұрғын үйлер. Тұрғын үйдің пайдалануға беру көлемінің ұлғайуы өткен жылмен салыстырғанда республиканың 15 өңірінде жалғасуда", — деді бірінші вице-министр.
