Еліміздің осы жылдың соңына дейін тағы 19 ферманы іске қосу жоспарланып отыр. Бұл туралы Ауыл шаруашылығы вице-министрі Азат Сұлтанов айтты, деп хабарлайды inbusiness.kz сайты.
Оның айтуынша, негізгі азық-түлік өнімдерінің басым бөлігі бойынша қамтамасыз ету деңгейі 80%-дан асады. Құс еті, балық, қант, ірімшік пен сүзбе, шұжық өнімдері және алма бойынша қамтамасыз ету деңгейін 80%-ға жеткізу мақсатында отандық өндірісті ұлғайту және импортты алмастыру жөнінде нысаналы жұмыстар жүргізіліп жатқаны белгілі болды.
"Мәселен, сүт саласының шикізат базасын нығайту мақсатында тауарлық-сүт фермаларын салуға жеңілдетілген несиелеу бағдарламасы іске асырылуда. Жалпы жылдық қуаты 500 мың тоннадан асатын 95 сүт-тауар фермасы қаржыландырылды, оның ішінде 71 ферма пайдалануға берілді. Осы жылдың соңына дейін жылдық қуаты шамамен 100 мың тоннаны құрайтын тағы 19 ферманы іске қосу жоспарланып отыр", – деді Азат Сұлтанов Үкімет отырысында.
Айта кету керек, бұған дейін Қазақстан ең қажетті өнімдермен ішкі сұранысты толық қамтып отырғанын жазғанбыз.
