Республикада астық сақтаудың жалпы сыйымдылығы 29 млн тоннаны құрайды. Жаңа егіннің сапасы да жақсы. Орталық коммуникациялар қызметінде өткен брифингте ҚР Ауыл шаруашылығының бірінші вице-министрі Айдарбек Сапаров осындай мәліметтермен бөлісті, деп хабарлайды inbusiness.kz.
"Соңғы бес жылда астық сапасы мұндай болмаған. Бүгінгі таңда лицензияланған элеваторларға 2,6 млн тонна астық келіп түсті, оның 91%-ы жоғары сапалы, яғни бірінші, екінші, үшінші санатты астық, ал 2020 жылы бұл көрсеткіш 83% деңгейінде болды. Ал 2019, 2018 жылдары – одан да төмен, шамамен 60% төңірегінде еді. Құрамында желімтігі жоғары бидай үлесінің айтарлықтай өсуі байқалады. Сапалы тазалаудан басқа, жем дайындауды міндеті тұр. Бүгінгі таңда бұл міндет іс жүзінде орындалды. 23,4 млн тоннаға жуық шөп (98%), 1,5 млн тоннадан астам пішен (99%), 1,2 млн тонна сүрлем (60%), 3,5 млн тоннаға дейін сабан (73%) дайындалды. Шөп дайындау жұмыстары қазан айының ортасында аяқталады", – деді вице-министр.
Айта кетейік, биыл жемшөп дайындау мәселесі аса өзекті. Барлық мәселелер апта сайынғы аппараттық отырыстарда талқылануда.
Құралай Құдайберген
