Бұл туралы Ұлттық экономика министрі Руслан Дәленов үкімет отырысында айтты, деп хабарлайды primeminister.kz.
"Қаңтар-наурызда жалпы ішкі өнімнің өсуі 3,8% дейін нығайды. Қаңтар-ақпанда ол 3,5% құраған. Өсудің үдеуіне өңдеу өнеркәсібі мен сондай-ақ құрылыс және инвестициялардағы өсу әсер етті", – деді Руслан Дәленов.
Биылғы қаңтар–наурызда өнеркәсіп өндірісі 3,2% өсті. Өңдеу өнеркәсібінің көптеген салаларында екі таңбалы өсу байқалды. Бұл – жеңіл өнеркәсіп, сусындар және пластмасса бұйымдарын өндіру, құрылыс материалдарын шығару, сондай-ақ машина жасау, оның ішінде автокөлік жасау.
Құрылыс жұмыстарының көлемі 8,9% артқан. Ауыл шаруашылығы тұрақты өсу қарқынын сақтап тұр – өндіріс көлемі 3,6% ұлғайды. Көрсетілетін қызметтер саласында өсудің орнықтылығы сақталуда. Есепті кезеңде ол 3,7% өсті. Көрсетілетін қызметтер сегментіндегі өсім көшбасшысы – сауда саласы. Оның өсімі 7,2% деңгейінде тіркелді. Ал көлік саласында өсім 4,4% құрапты.
Сыртқы сауда айналымы жағымды үрдіс көрсетуді жалғастыруда. Биылғы қаңтар–ақпанда ол 7,5% ұлғайды және негізінен экспорттың 11,1% ұлғаюының есебінен болды.
Ұлттық экономика министрі баяндамасын аяқтай отырып, көптеген көрсеткіштер бойынша І тоқсан қорытындысы бойынша жақсару байқалатынын айтты.
