Өңірлік коммуникациялар қызметі алаңында Алматы Кәсіпкерлер палатасының директоры Айтуар Қошмамбетов карантин талаптарының жеңілдетілуіне байланысты бірқатар мәселелерді түсіндірді, деп жазды inbusiness.kz.
Айтуынша, енді нысандарда Ashyq қолдану міндетті емес. Бірақ бизнестің өзінің шешімі бойынша ерікті түрде қолдануға рұқсат етілген. Сонымен қатар жабық кеңістікте бетперде тағу талабы сақталады.
"Алматыда шектеу шаралары кезінде Ashyq жобасына 24 мыңнан астам бизнес субъектілері қатысты. Ashyq коронавирустың таралуын болдырмау және бизнес қауымдастығын қолдау мақсатында енгізілді. Эпидемиологиялық ахуалдың жақсаруына байланысты Коронавирустық инфекцияның таралуына жол бермеу жөніндегі ведомствоаралық комиссия шектеу шараларын жеңілдету туралы шешім қабылдады", – деді Айтуар Қошмамбетов.
Ол еліміздің бас санитарлық дәрігерінің биылғы жылғы 14 наурыздағы қаулысына сәйкес эпидемиологиялық қауіп-қатердің "сары" және "жасыл" аймақтарындағы Ashyq жобасының қатысушылары өз қызметін шектеусіз жүзеге асыратынын атап өтті. Қазіргі уақытта Алматы "жасыл" аймақта орналасқан.
"Қызыл аймақта орналасқан аймақтардағы Ashyq қатысушылары өз қызметін объектілердің толуы бойынша шектеулермен жүзеге асыра алады. Бұдан басқа, бизнес өкілі вакциналанған қызметкерлер мен келушілерге қойылатын талаптарды енгізу қажет пе, жоқ па, соны өзі шешеді", – деп атап өтті Алматы қаласы Кәсіпкерлер палатасының директоры.
Айтуар Қошмамбетовтың айтуынша, көптеген азаматтар бетперде режиміне қатысты тармақты қате қабылдаған. Жабық жерлерде және қоғамдық көліктерде маска режимі әлі де міндетті болып табылады, сондықтан осы талаптарды сақтауды жалғастыру қажет.
Бұлардан басқа, елдің бас санитарлық дәрігерінің қаулысымен: күндізгі режимде (қызмет көрсету объектілері) COVID-19-ға қарсы вакцинация алмаған қызметкерлерді жұмысқа жіберуге шектеулер, сондай-ақ вахталық әдіспен жұмыс істейтін ұйымдардың қызметкерлері үшін вахтаға кіру және шығу кезінде ПТР әдісімен міндетті зертханалық тестілеу алынып тасталды.
Айтуар Қошмамбетов бас санитарлық дәрігердің қаулысының қосымшасында "қызыл" мәртебесі бар келушілерді анықтау шаралары көрсетілгенін айтты.
Құралай Құдайберген
