Парламент Мәжілісінің төрағасы Ерлан Қошанов кезектен тыс сайлауда дауыс берді. Бұл ретте ол БАҚ өкілдерінің бірқатар сұрағына жауап берді, деп хабарлайды inbusiness.kz.
Бастапқыда ол Парламент құрамының жаңаруы туралы ойымен бөлісті.
"Жаңа министрлер қатарына жаңа адамдар келуі мүмкін. Қанша екенін айта алмаймын. Бірақ өз ісін білетін, ел игілігі үшін еңбек ететіндер келеді деп сенеміз", – деді Мәжіліс төрағасы.
Бұл ретте тілшілер Ерлан Қошановтан "сайлау әділ өтті ме?" деп сұрады.
"Иә, әділ өтіп жатқанын көріп тұрмын. Өйткені мемлекет пен қоғамның өзінің ашықтығын көріп отырсыз. Қазір қадағалап отырған бақылаушылар көп", – деді Қошанов.
Сонымен қатар ол болашақта Мәжілісті кім басқаратыны туралы айтты.
"Болашақта Мәжілісті кім басқаратынын келетін депутаттар шешеді", – деп нақтылады.
