"Нұр-Сұлтан, Алматы және Шымкент қалаларындағы сауда базарларын жаңғыртуды 2023 жылға қалдыру мәселесі шешілді. Бәрі де бұл шешімнің дәл қазіргі жағдайда қаншалықты маңызды екенін түсінеді. Алайда пандемияның жағымды жақтары да бар. COVID-19 пандемиясы электронды сауданың және онлайн сатылымның өсіміне жол ашты", – деді Нариман Әбілшайықов сауда және интеграция министрлігінің алқа отырысында.
Басқарма төрағасының орынбасары нақтылағандай, карантин кезінде интернет арқылы жасалатын бөлшек сауда көрсеткіші айтарлықтай өскен.
"Дәрі-дәрмектің, тұрмыстық заттардың және азық-түлік саудасының өсімі байқалды. "Қазпошта" АҚ мәліметі бойынша, электрондық коммерция нарығы 2020 жылдың 1 жартыжылдығында 435 млрд теңгеге жетті. Бұл бөлшек сауда айналымының 9,4%-ын құрайды. 2020 жылдың соңында көрсеткіш шамамен 900 млрд теңгені құрады. 2022 жылға қарай 1,9 трлн теңгеге жетеді деген болжам бар. Карантин кезеңінде қолма-қол ақшасыз төлем операциясы едәуір артты", – деді Нариман Әбілшайықов.
Қанат Махамбет
