Бразилияның Петрополис қаласында су тасқыны мен көшкін салдарынан қаза тапқандар саны 152 адамға жетті, деп жазды inbusiness.kz.
Бразилиялық G1 порталының мәліметінше, тағы 165 адам із-түзсіз жоғалғандар тізімінде.
967 адам қауіпсіз аймақтарға көшірілді. Іздестіру-құтқару жұмыстарына 500-ге жуық өрт сөндіруші жұмылдырылған. Әскерилер мен еріктілер Петрополистің 51 ауданында жұмыс істеуде. Ылғалды ауа райына байланысты көшкін қайталануы мүмкін.
Рио-де-Жанейро губернаторы Клаудио Кастро апат аймағына сапары кезінде журналистерге аймақта 1932 жылдан бері жауын-шашынның ең көп жауғанын айтты.
Метеорологтардың мәліметінше, 15 ақпанда Петрополисте ай сайынғы жауын-шашын мөлшері небәрі 6 сағатта жауған.
Бұл аймақта 2011 жылы осындай табиғи апат болып, ол кезде 900-ден астам адам қаза тапқан болатын.
