Маңғыстау облысындағы Шетпе ауылында түйе етін консервілеу цехы ашылды, деп хабарлайды 24.kz.
Ауыл кәсіпкері Мұхтар Қармысов ашқан кәсіпорын әзірге тәулігіне 1 мың қалбыр бұқтырылған ет дайындайды. 3 жылға дейін сақталатын консервінің бір данасы – 480 теңге.
Іске қосылған күннен бастап өңірдегі ірі сауда орталықтары кәсіпорын өніміне тапсырыс беруге көшті. Ал жобаның жалпы құны – 25 млн теңге.
"Біздің жұмысымыз – халықтан мал етін алып, соны консервілеу, қалбырлау. Мұнда төрт түлік малдың етін жабамыз. Соның ішінде негізгі ұстанып отырған ұстанымымыз – түйенің етін жабу. Облыста түйенің етін жауып, халыққа сапалы өнімді берудің жолында жұмыс жасап жатырмыз", - дейді "Сегізбай ата" ауылшаруашылық кооперативінің төрағасы Қармысов.