"Қазақстан инжиниринг" жекешелендірудің екінші толқыны аясында "КИ 832-автожөндеу зауытын" сатып жіберді деп хабарлайды LS.
Электронды сауда алаңында жарияланған ақпаратқа сәйкес, зауыттың 100%-дық үлесі саудаға қойылған. "Бағалау және сараптама" компаниясының мәліметіне сүйенсек, 2016 жылдың 1 сәуірінде зауыттың болжалды құны 329,6 млн теңгені құрады.
Сауда-саттық бағаны төмендету әдісімен өткізілді. Сатылымның бастапқы құны шамамен 330 млн теңгені құраған, алайда кейін 70,8 млн теңгеге дейін төмендетілген.
Анықтама: Қайта құрылған Орта Азия әскери округінің автожөндеу базасын дамыту мақсатында 1970 жылы автокөлік министрлігіне тиесілі аумақта "651-автокөлік жөндеу шеберханасы" құрылған болатын. Дәл осы жылдан бастап ЗИЛ-157 және ГАЗ-69 қозғалтқыштарын күрделі жөндеу қолға алына бастады.
Мекеме 1989 жылдың 1 желтоқсанынан бастап шаруашылық есепке көшіріліп, атауы "УАЗ көліктері мен агрегаттарын және ГАЗ-24 жеңіл автокөліктерін жөндейтін 832-әскери зауыт" деп ауыстырылған болатын.
2003 жылы зауыт акционерлік қоғам ретінде қайта құрылып, "Қазақстан Инжиринг" компаниясы құрамына қосылды.
