Халықаралық электробайланыс одағының (ХЭО) комитеті (БҰҰ-ның мамандандырылған мекемесі) Ресейден еуропалық спутниктік жүйелердің жұмысына араласуды тоқтатуды талап етті, деп хабарлайды Inbusiness.kz сайты Reuters агенттігіне сілтеме жасап.
Мұндай әрекеттерге Украина, Франция, Нидерланды, Швеция мен Люксембург шағымданды.
Бұл елдер соңғы айларда GPS навигациялық жүйесінің спутниктері үлкен кедергілерге тап болғанын, әсіресе ұшақтардың ұшуын басқаруға кедергі келтірілгенін алға тартты. Сонымен қатар, балалар телеарналарының эфирі Украинадағы соғыста түсірілген, қатыгездік бейнеленетін бейнематериалдармен үзілді.
ХЭО-да кедергі тудырған сигналдар "Мәскеу, Калининград пен Павловка аудандарында орналасқан жерүсті станцияларынан шыққан сияқты" деп атап өтілді. Мекеме бұл мәселеге "қатты алаңдаушылық" білдірді, Ресей Федерациясын мұндай әрекеттерді тоқтатуға шақырды.
