Ақпаратқа сәйкес, ел халқының кітапханаларға деген қызығушылығы жоғары.
Соңғы 26 жылда Қазақстандағы кітапханалар саны екі есеге қысқарған (7352-ден 3920-ға дейін). Дегенмен де адамдардың кітапханаларға бару көрсеткіші 1995 жылғы статистикамен бірдей. Тіпті 3,54%-ға артық деуге болады.
1999 жылы кітапханаға келушілер саны бар болғаны 2,6 млн адам болған. Бірақ содан бері кітапханалар біртіндеп танымалдыққа ие бола бастады. Былтыр бұл көрсеткіш 6 миллионнан асқан. Соның ішінде 34,6% адам (2,1 млн) кітапханалардың интернет-ресурсын пайдаланған көрінеді.
Ұлттық статистика бюросының мәліметіне сәйкес, былтыр ел кітапханаларының тек 56,7%-ы Интернетпен қамтамасыз етілген. Ең төменгі көрсеткіштер Батыс Қазақстан (28,5%), Атырау (30,6%) және Алматы (32%) облыстарында байқалған. Республикадағы ең үздік көрсеткіш Алматы қаласында (100%) тіркеліп отыр.
Компьютерлермен қамтамасыз етілу жағдайы да біркелкі емес. Ел бойынша барлығы 11,5 мың компьютер орнатылған. Олардың тек үштен бірі ғана кітапханаға келушілерге арналған.
1995-2021 жылдар аралығында елдегі мәдениет мекемелері арасында кітапханалардың саны әлдеқайда көп деген тұжырым жасауға болады.
