Желіде Щучинск қаласы тұрғындарының батареяларынан сарылдай ағып жатқан мазуттың фотолары мен видеолары пайда болды.
Бурабай ауданының әкімі Арай Садықов бұған жылу қазандығындағы апат себеп болғанын және қазіргі кезде жылыту жүйесінде тазарту жұмыстары жүргізіліп жатқандығын мәлім етті, деп хабарлайды inbusiness.kz сайты.
Аудан әкімі Арай Садықовтың айтуынша, желтоқсанның 3-де Щучье қаласының №12 қазандығының мазут ыдысындағы бу құбырында диаметрі 32 мм жарық пайда болған. Бұл ретте қазандықтың су құбыры жүйесіне аз мөлшерде мазут түсіп, кейіннен жылу жүйесіне тарады. Салқындатқыштың айналымы кезінде су қоспасы қазандыққа жақын орналасқан нысандардың ішкі жылу жүйесіне түсті, оның ішінде 5 көппәтерлі тұрғын үй және № 8 мектеп-гимназиясы бар. Бұл қазандық "Станционный" шағынауданын және Бурабай курорты станциясының темір жол кәсіпорындарын жылумен қамтамасыз етеді.
- Қазіргі уақытта "Жаңа Тұрмыс 2020" ЖШС қызметкерлерінің күшімен №8 мектеп-гимназиясында жылу жүйесін тазарту жұмыстары жүргізіліп жатыр. Жылумен жабдықтау жүйесіне таза су беріледі. Щучье қаласының барлық 7 қазандығы штаттық режимде жұмыс істеп тұр, жылу беру сыртқы ауа кестесіне сәйкес жүзеге асырылады, - деп жазды аудан әкімі әлеуметтік желідегі парақшасында.
Айтуынша, қала тұрғындары жылумен жабдықтау сапасы мәселелері бойынша "Жаңа Тұрмыс 2020" ЖШС диспетчерлік бөлмесіне 44300 телефоны бойынша хабарласа алады.
