Түркістан облысында қарызы үшін шетелге шыға алмағандар қатары 200 мыңға жетті. Бұл туралы өңірдің кірістер департаментіне қарасты борышкермен жұмыс басқармасының басшылығы мәлімдеді, деп хабарлайды Atameken TV.
Аталған басқарма басшысының міндетін атқарушы Әбіт Бекжігіттің айтуынша, түрлі қарызы бар азаматтардың қатары жылдан жылға артып отыр. Жыл басынан бері борышкерлердің бюджетке берешегі 12 миллиард теңгеге жеткен. Салық кодексіне сәйкес, берешекті жою мақсатында олардың мүліктерін сату арқылы қарыздарды қайтару қарастырылған.
Бұл ретте осы жылдың 6 ай көлемінде 853 азаматқа қатысты жалпы 1,9 млрд теңгеге мүлікті сату актісі түзілген. Ал берешек сомасы толық өтелуіне байланысты 695 борышкердің 1,2 млрд теңге тұратын мүлкі сатудан алынды.
