Жыл басынан бері Алматы облысында 29 мың жұмыс орны құрылды. Бұл туралы өңір әкімі айтты, деп хабарлайды ortcom.kz.
Экономиканың нақты секторын дамытудың оң динамикасы жергілікті бюджеттің кірісін соңғы үш жылда 1,5 есеге көбейтіп, 194 млрд теңгеге жеткізуге мүмкіндік берді.
"Жыл басынан бері облыста 29 мың жұмыс орны ашылып, жұмыссыздық деңгейі 4,6%-ға төмендеді. Бүгінгі күні 43503 кәсіпорындағы 79,4 мың жұмысшы төмен жалақы алады. Қазіргі кезде 14 мың жұмыс беруші 32 мың жұмыскерінің жалақысын көтеруге дайын. Бюджеттік ұйымдардың 41 мың қызметкерінің жалақысы орта есеппен 35% өседі. Сол сияқты 2019 жылдың 1 қаңтарынан 133,5 мың адам президенттің салықтық жүктемені төмендету жөніндегі бастамасынан кейін жоғары жалақы алатын болады", – деді Амандық Баталов.
Мемлекет басшысының Жолдауын жүзеге асыру аясында облыстағы барлық кәсіпорындармен жалақысы төмен жұмысшылардың айлығын көтеру туралы жұмыстар жүргізілген.
Жыл басынан бері облыстағы орташа айлық жалақы 5% өсіп, 114 мың теңгені құрап отыр. Халықтың нақты ақшалай кірісі 0,8%-ға өскен.
Сонымен қатар тұрғын үй-коммуналдық шаруашылығы қызметтерінде тарифтерді төмендету мақсатында монополистермен жұмыс жүргізілді. Мәселен, "Қапшағайжылу" тарифті – 77%, "Талдықорғанжылусервис" – 16,3%, "Жетісу Энерготрейд" 2,4% төмендетті.
"Көмір бағасын төмендету үшін көмір қоймаларымен тікелей келісімшартқа отыратын бірыңғай операторды белгілеу мәселесі қарастырылуда. Мұндай шараларды жүзеге асыру арқылы көмірдің бағасын арзандатуға мүмкіндік туады", – деп атап өтті облыс әкімі.
