Бірыңғай жинақтаушы зейнетақы қоры (БЖЗҚ) салымшыларының зейнетақы жинақтары 1 тамызда 8,57 трлн теңге (қазір 1 доллар-360,71 теңге) болды, деп хабарлайды БЖЗҚ.
Салымшылардың зейнетақы жинақтары 1 шілдеде 8,444 трлн теңге болған. Осылайша, шілде айында олар 1,5%-ға өскен.
"Табыстылық 2018 жылдың басынан бері 5,3%-ды құрады, ал инфляция 2,7% болды. Инфляция 5,9% болғанда, зейнетақы активтерінің жылдық көрсеткіштегі табыстылығы 8,9%-ды көрсетті", - деп жазылған БЖЗҚ-ның таратқан баспасөз-баянында.
Ақпаратқа сәйкес, түскен түсімдердің жалпы сомасы 2018 жылдың жеті айында 478,83 млрд теңге болған. БЖЗҚ мәліметі салымшылардың келісімшарттың барлық түрі бойынша жеке зейнетақы шоттарының (ЖЗШ) саны 2018 жылдың 1 тамызында 10,22 млн шот болғанын көрсетіп отыр.
2018 жылдың 1 тамызында БЖЗҚ-ның жиынтық инвестициялық портфелінің негізгі үлесін бұрынғыша мемлекеттік құнды қағаздар құрап отыр,ол - 47,48%. Екінші деңгейлі банктердің қаржылық құралдарына ( облигациялар, акциялар мен эмитенттердің депозитарлық қолхаттары, депозиттер) зейнетақы активтерінің 18,49%-ы, ал шетелдің мемлекеттік құнды қағаздарына 11,25%-ы,квазимемлекеттік сектордың облигацияларына 8,15 %-ы салынған деп көрсетілген ақпаратта.
"БЖЗҚ" АҚ 2013 жылы құрылған. "БЖЗҚ" АҚ-тың құрылтайшысы және акционері – Қазақстан Республикасының үкіметі.
"БЖЗҚ" АҚ-тың мемлекеттік акциялар пакеті Ұлттық банктің сенімгерлік басқаруында. "БЖЗҚ" АҚ-тың зейнетақы активтерін Ұлттық банк Қазақстан президенті жанындағы зейнетақы активтерін басқару жөніндегі кеңеспен бірлесіп басқарады. 2016 жылдың 1 қаңтарынан бастап зейнетақы активтерін басқарудың тиімділігін арттыру бойынша ұсыныстарды жасауға қатысты міндеттер Қазақстан президенті басқаратын Ұлттық қорды басқару жөніндегі кеңеске берілген.
Қазақстан халқының саны 18,5 млн адам.
