Енді оның Қазақстанға қашан экстрадицияланатыны белгілі болмақ, деп хабарлайды inbusiness.kz сайты.
– Іздеуде жүрген Oskay Tarik Volkan Қазақстан Республикасының аумағында емес, себебі оны 9 маусым күні Черногорияның құзырлы органдары ұстаған, – деді Алматы прокурорының бірінші орынбасары Н.Ракишев.
Қазақстандық тарап Черногорияның құзырлы органдарына оны экстрадициялау туралы өтініш жібергенін жария етті.
– 25 маусымда ҚР Бас прокуратурасы Черногория Республикасының Әділет министрлігіне Oskay Tarik Volkan-ды қылмыстық жауапкершілікке тарту үшін Қазақстан Республикасының құзырлы органдарына беру жөнінде өтініш жолдады. Қазіргі уақытта Черногорияның құзырлы органдары бұл өтінішті қарап жатыр. Қарау нәтижесі бойынша тиісті шешім қабылданады, – деп жазады Алматы прокуратурасы ресми жауабында.
3 жыл бұрын Astana International Exchange (AIX) алаңы NEF Qazaqstan компаниясының 6 миллиард теңге көлемінде алғашқы облигацияларын орналастырғанын мәлімдеген болатын.
Десе де, 2023 жылы компания AIX платформасында алғаш рет дефолтқа жол берді, ол 4 миллиард теңгеден асатын негізгі қарызды, сондай-ақ 402 миллион теңге көлеміндегі купондық төлемді өтеуде өз міндеттемелерін орындай алмаған.
Бірнеше ай бұрын ғана Алматы полициясы 51 жастағы NEF Qazaqstan басқарушы серіктесіне Түркияның ірі құрылыс холдингі NEF-тің қазақстандық өкілдігіне қатысты алаяқтық фактісімен қылмыстық істі тергеп жатқанын хабарлаған-ды.
