Өңірлік коммуникациялар қызметінде өткен баспасөз мәслихатында Алматы қаласы мемлекеттік кірістер департаменті басшысының орынбасары Орынкүл Қазиева таңбаланбаған темекі өнімдерін сатуға тыйым салынатынын мәлім етті, деп жазды inbusiness.kz.
"2020 жылдың 1 қазанынан бастап Қазақстанда құрамында темекі бар фильтрлі сигареттерді міндетті цифрлық таңбалау енгізілгені белгілі. 2021 жылдың 1 сәуірінен бастап таңбалау темекі өнімдері мен олардың алмастырғыштарының барлық түрлері үшін міндетті болды. Темекі өнімдерін сандық кодсыз сатуға тыйым салынады. Биылғы жылдың 16 қыркүйегінен бастап темекі өнімдерін таңбалау жұмыстары жеңілдетілді, темекі өнімдерін таңбалау тек өндірушілер/импорттаушылар және көтерме сатушылар деңгейінде жүзеге асырылады. Бөлшек сатушыларға 2D-сканерлерді сатып алмай және қолданбай тауарларды алғанын растау жеткілікті болады", - деді Орынкүл Қазиев.
Бұл ретте спикер нарық қатысушылары үшін Nasty Sounds alsa тегін мобильді қосымшасы әзірленгенін айтты. Сондай-ақ қоғамдық бақылау құралы ретінде Naqty Оnim тегін мобильді қосымшасы әзірленді.
"Осы қосымша арқылы біздің еліміздің әрбір азаматы темекі өнімдерін сатып алған кезде олардың түпнұсқалығын тексере алады және сатып алынатын өнімнің сапасына көз жеткізуге мүмкіндік бар", – деді спикер.
Еске сала кетсек, тауарларды цифрлық таңбалау Еуразиялық экономикалық одақ аумағында жүзеге асырылатын мемлекетаралық жоба.
