Өткен тәулікте дерт 10 мың 418 адамнан анықталды. Бұл жаңа антирекорд. Науқастардың жартысынан көбі елорда тұрғындары. Нұр-Сұлтанда 5 жарым мыңнан астам жағдай тіркелді. Алматыда тәуліктік көрсеткіш 1 115-ке жетті. Үштікті 820 науқаспен Қарағанды облысы түйіндейді.
Осылайша, жасыл зонада Түркістан, Солтүстік пен Шығыс Қазақстан облыстары ғана қалды. "Сары" аймақта: Алматы, Жамбыл, Қостанай өңірлері. Қалған 3 мегаполис пен 8 облыс қауіпті қызыл зонада.
Эпидахуалдың ушығуы әрі омикронның таралуына байланысты бүгіннен бастап елде шектеу шаралары күшейтілді. Бас санитардың жаңа қаулысына сәйкес "Ashyq"-қа қосылған нысандардың жұмыс уақыты қысқарды. Сондай-ақ жұмыс және демалыс күндері сауда орталықтары мен сауда үйлеріне тек статусы "жасыл" азаматтар ғана кіргізіледі. Спорттық-сауықтыру, фитнес орталықтарына, бассейндерге, сауналарға, моншаларға кіру үшін де дәл осындай талап қойылды.
