Дамаск ұлттық мұражайынан көне мүсіндер мен басқа да жәдігерлер ұрланды. Мұражайдан Рим дәуіріндегі алты мәрмәр мүсін жоғалып кеткен, деп жазады inbusiness.kz сайты.
Қазір ұрлыққа қатысты тергеу басталып, музейдің қауіпсіздік және мониторинг жүйелерін күшейту шаралары қолға алынды.
Дамаск провинциясының ішкі қауіпсіздік басқармасының басшысы Осама Аткенің айтуынша, қауіпсіздік күштері ұрлықты тергеп жатыр. Мұражай күзетшілері мен басқа да қызметшілер жауап алуға шақырылды.
1919 жылы негізі қаланған Дамаск ұлттық мұражайында Сириядағы ең құнды археологиялық коллекция сақталған. Онда б.з.д. XIV ғасырдағы Угариттен шыққан сына жазуы бар саз тақтайшалар бар, онда ең көне толық әліпбидің дәлелі табылған.
Сондай-ақ коллекцияға Ежелгі дүниенің ең маңызды мәдени орталықтарының бірі Пальмирадан б.з. І-ІІ ғасырлардағы грек-рим мүсіндері; және Дура-Европоста салынған б.з. ІІІ ғасырдағы синагога кіреді.
Айта кетейік, бұған дейін Париждегі Лувр мұражайынан құнды жәдігерлер ұрланған болатын.
