Жуырда ғана ІВО тұжырымы бойынша әлем чемпионы атанған Данияр Елеусінов алдағы уақытта кіммен жұдырықтасқысы келетінін айтты, деп жазды Inbusiness.kz.
"Мен алдағы уақытта IBF тұжырымдамасы бойынша үздік 15-тікке кіремін. Ол тұжырым бойынша әлем чемпионы Эррол Спенс. Соған жақсы қарсылас боламын деген ойдамын", – деген спортшы неге көбіне АҚШ-та жаттығатынын айтты.
"АҚШ-та ауа райы қолайлы, спарингке шығатын адамдар жағынан қолайлы. Басқа айтарлықтай айырмашылық жоқ. Ол жақта ең ұзақ 1 жыл 2 ай болдым. Елді сағынасың, туыстарыңды, достарыңды, бала-шағаңды дегендей. Мен көбінесе АҚШ-та жаттығамын, жекпе-жектерім де сол елде өтеді. Тек осы кездесуді Қазақстанда өткіздім. Көбі елде кездесу өткізді, енді тек осында қалады деп ойлайды екен. Енді келесі кездесулерімнің барлығын Америкада өткізуді жоспарлап отырмын", – деді әлем чемпионы.
