Қазақстанның депозиттерге кепілдік беру қоры (ҚДКБҚ) "Delta Bank" АҚ салымшыларына өтемді төлеуді соңғы күнін қоса санағанда 2022 жылдың 1 мамырына дейін ұзарту туралы "Банк ЦентрКредит" АҚ-пен келісімге қол қойды, деп хабарлайды inbusiness.kz.
Еске саламыз, өтем төлейтін агент банк ретінде осы банк таңдап алынған болатын.
Көрсетілген мерзім ішінде "Delta Bank" АҚ салымшылары агент банктің жергілікті бөлімшелеріне жүгініп, кепілдік берілген өтемді төлеу жөніндегі өтінішті бере алады. "Жеке өзі келген жағдайда салымшының жеке басын куәландыратын құжаты болса жеткілікті, ал егер сенім артылған тұлға келетін болса, салымшының атынан өтем алу құқығын растайтын құқық белгілеуші құжаттарды ұсынады (мысалы, нотариус куәландырған сенімхат)", - деп хабарлады ҚДКБҚ баспасөз қызметі.
"Delta Bank" АҚ салымшыларына кепілдік берілген өтем агент банк арқылы 2018 жылдың 17 мамырынан бері төленіп келеді. Үш жыл ішінде жалпы сомасы 107,3 млн теңгеге қаржы қайтарылды. Бұл Қор міндеттемелерінің жалпы сомасының 53%-ын құрайды.
2021 жылдың 1 мамырына қарай кепілдік берілген өтемді алу үшін 328 салымшы ғана өтініш берген. Бұл олардың жалпы санының 12%-ы.
"Агент банкке келушілер санының аз болуы "Delta Bank" АҚ-та ашылған шоттар мен депозиттердегі қалдық ақшалардың аздығына байланысты болып отыр. Нақты айтар болсақ, 963 салымшының әрбірінің шотындағы қалдық ақша 1000 теңгеден төмен, сондай-ақ 412 салымшының шоттарында – 1 000 теңгеден 5 000 теңгеге дейін болса, 158 салымшыда - 5 000 теңгеден 10 000 теңгеге дейін бар", - деп хабарлады ҚДКБҚ баспасөз қызметі.
Дегенмен "Delta Bank" АҚ-тағы шоттарында 100 000 және 1 000 000 теңгеден астам қаражат жинаған салымшылардың да бар екенін айта кеткен жөн. Сондықтан Қор осы және кепілдік берілген өтемді алуға құқығы бар басқа да салымшылар үшін агент банк арқылы төлем алу мерзімін соңғы күнін қоса санағанда 2022 жылдың 1 мамырына дейін ұзартты.
"2022 жылдың 1 мамырынан кейін "Delta Bank" АҚ салымшылары бұрынғыдай Қорға өтем алуға тікелей өтініш бере алмайды. Қор талап етілмеген кепілдік берілген өтемді Қазақстан Республикасының зейнетақымен қамсыздандыру заңнамасына сәйкес депозитордың атына Бірыңғай жинақтаушы зейнетақы қорында ашылған, ерікті зейнетақы жарналарын есепке алуға арналған жеке зейнетақы шотына аударады", - деп хабарлады ҚДКБҚ баспасөз қызметі.
Еске саламыз, агент банк кепілдік берілген өтемді жеке тұлғалар мен кәсіпкерлердің шоттары, карточкалары және депозиттері бойынша төлейді. Кепілдік мөлшері:
ұлттық валютадағы қаражаттар бойынша – 10 млн теңгеден;
шетел валютасында қаражаттар бойынша ("Delta Bank" АҚ-ты мәжбүрлеп тарату туралы сот шешімі заңды күшіне енген күні белгіленген валюта айырбастау бағамы бойынша) – 5 млн теңгеден аспайды.
Салымшылар кепілдік берілген өтемді алудың өздеріне ыңғайлы тәсілін: агент банктің кассасынан қолма-қол ақшамен немесе өтініш берушінің банк шотына аудару арқылы алуды таңдауға құқылы. Бұл ретте банк деректемелері салымшының өтінішінде нақты көрсетіледі.
Ескн сала кетсек, Қазақстанның депозиттерге кепілдік беру қоры барлық банк операцияларын жүргізу лицензиясынан айырылған банк салымшыларына өтем ақша төлейді. Осылайша Қор қаржы тұрақтылығына және азаматтарымыздың банк жүйесіне деген сенімін нығайту бағытында жұмыс істейді.
