2024 жылғы 1 қаңтардағы жағдай бойынша "Психоактивті заттарды пайдалану салдарынан психикалық мінез-құлық бұзылыстары" диагнозымен 108 мың 722 адам динамикалық бақылауда тұр, оның ішінде 18 329-ы - есірткі құралдары мен психотроптық заттарға тәуелді, деп хабарлайды inbusiness.kz сайты.
ОКҚ алаңында өткен дөңгелек үстел барысында Медициналық көмекті ұйымдастыру департаменті басқармасының бастығы Анжела Бексұлтанова осындай деректерді келтірді.
"Нашақорлардың 91% (16 817) – ерлер, 9% (1 512) – әйелдер, 2 734 (15%) – 18 бен 29 жас аралығындағы жастар, 66 – балалар мен жасөспірімдер. Өкінішке орай, ресми статистикада елдегі есірткіге тәуелді адамдардың нақты санын көрсетілмеген. Өйткені бұл көрсеткіш латентті болып табылады. Көптеген нашақорлар өздерінің жағдайын жасырады", - деді спикер.
2023 жылы тәулік бойы жұмыс істейтін стационар жағдайында есірткіге тәуелді 3 534 науқас емделді.
"20 жылдан бері нашақорларды медициналық-әлеуметтік оңалтудың кешенді бағдарламасы іске асырылып келеді, оған детоксикация, психотерапиялық және психокоррекциялық емдеу, әлеуметтік оңалту кіреді", - деді Денсаулық сақтау министрлігінің өкілі.
Биыл медициналық-әлеуметтік оңалту бөлімшелерін Абай, Ұлытау, Маңғыстау және Шығыс Қазақстан облыстарында ашу жоспарлануда.
