Елімізде денсаулық сақтау және әлеуметтік қызмет сала мамандарының жалақысы 32%-ға өсті, деп хабарлайды inbusiness.kz ranking.kz-ке сілтеме жасап.
Мәселен, 2020 жылдың төртінші тоқсанында аталған сектор мамандарының шартты айлығы 197,4 мың теңгені құрады. Бұл 2019 жылдың сәйкес кезеңінен 32,1% жоғары. Сонымен қатар бұл 2015 жылдан бері ең үлкен көрсеткіш. Бұған қоса инфляцияны ескергенде сала мамандарының сатып алу қабілеті 23,1%-ды құрады.
Салыстырып көрелік, өткен жылы еліміз бойынша жалақы орта есеппен 14,3%-ға өсті. Осылайша қазақстандықтардың орташа айлығы 233,1 мың теңгеге жетті. Ал медицина мамандары мен әлеуметтік сала қызметкерлерінің айлығы бұдан 15% төмен.
Еңбек және халықты әлеуметтік қорғау министрлігінің мәліметінше, 2021-2023 жылдары аталған сала мамандарының еңбек ақысын 2 есе жоғарылату жоспарланған.
Яғни, 2021 жылдың 1 қаңтарынан – 50%, 2022 жылы — 25%, 2023 жылы — 25%. Денсаулық сақтау министрі Алексей Цойдың айтуынша 2023 жылы медицина мамандарының жалақысы еліміздегі орташа айлықтан 2 есе жоғары болады.
Құралай Құдайберген
