Биылғы жылдың бірінші жартыжылдығында денсаулық сақтау саласына қарастырылған жергілікті бюджет шығыстары бірден 15,2%-ға қысқарып, 83,6 млрд теңгені құрады, деп хабарлайды inbusiness.kz тілшісі finprom.kz-ке сілтеме жасап.
Салыстырмалы түрде алсақ, бір жыл бұрын осы кезеңде жергілікті бюджет шығыстары 98,6 млрд теңгені құрап, 79,2% өскен.
Биыл жергілікті бюджет шығыстарындағы денсаулық сақтау саласының үлесі 2,3% болды. Ал 2018 жылға дейін оның үлесі 15-20% шегінде еді.
Өңірлер бойынша денсаулық сақтау саласына ең көп қаражат Алматы қаласының жергілікті бюджетінен қарастырылған: 15,7 млрд теңге - бір жыл бұрынғыдан 3,1% артық.
Осы көрсеткіш бойынша алдыңғы қатарлы аймақтар қатарында Қарағанды мен Жамбыл облыстары бар: әрқайсысы сәйкесінше 8,1 млрд теңге, + 17,2% және + 51,6%.
Ал ең аз қаржы бөлінген аймақтар Ақмола (1,6 млрд теңге), Маңғыстау (2,2 млрд теңге) және Солтүстік Қазақстан (2,3 млрд теңге) облыстары.
Орта есеппен еліміздің бір тұрғынына 4,4 мың теңге жұмсалған. Ең жоғары көрсеткіш - Алматы (бір адамға 7,9 мың теңге), Жамбыл облысы (7,1 мың теңге) және Қарағанды облысы (5,9 мың теңге) бөлді. Ақмола облысында бір тұрғынға ең аз қаржы жұмсалды - 2,2 мың теңге.
Құралай Құдайберген
