Мәжіліс депутаты Ермұрат Бәпи Атырауда мемлекеттік туды қорлап, суретке түскен төрт әйелдің артында тұрған күштерді және жалған туды дайындаушыларды анықтап, жазаға тартуды ұсынды, деп хабарлайды inbusiness.kz сайты.
Ермұрат Бәпи Бас прокурор Берік Асыловқа депутаттық сауал жолдады.
"Мемлекетіміздің басты рәміздерінің бірі – Көк туымызды қорлаушылар бой көрсетті. Жуырда ғана Атырауда болған оғаш оқиға қоғамда үлкен резонанс туғызып, азаматтардың ашу-ызасын тудырып отыр. Бет-аузын тұмшалап, қара жамылған төрт әйел мұз айдынында өткен спорттық жарыс кезінде Қазақстанның мемлекеттік туын ұстап түскен сурет әлеуметтік желілерге кеңінен тарап кетті. Олардың қолындағы мемлекеттік тудың бетіне араб жазуы мен араби қылыштың сұлба-суреті салынған. Мұнда біздің назарымызды аударған – көк тудағы араб қарпіндегі жазудың өте сапалы түрде, арнайы баспа құралымен таңбалануы. Демек, бұл – жай ғана тұрмыстық бұзақылық, әдепсіз шектен шығушылық қана емес", - деді депутат.
Депутат бұл біздің қоғамымызға жасалған ашық және нақақ қарсылық екенін баса айтты.
Оның сөзінше, Мемлекеттік туды қорлауға қатысты заң бұзушылық қатаң әрі мүлтіксіз жазалануы тиіс.
"Бірақ ескере кететін бір жайт. Елдің туын бүлдіру арқылы жат пиғылды дәріптемек болған бұл төрт қыз әлдебір арандатушы топтың құрбаны болуы мүмкін. Олар жастық алаңғасырлықпен, әлде материалдық қызығушылықпен немесе діни сауатсыздықпен жасаған бұл өрескел заң бұзушылықтың тасасында тұрған әлдебір кереғар күштер бар сияқты. Міне, әкімшілік тұрғыдағы жазасын алған төрт қыздан бұрын, осы қылмысты әрекетті ұйымдастырушылар жазаға тартылуы тиіс", - деді мәжілісмен.
Осындай түр-түсі бұрмаланған Қазақстан туы Wildberries маркетплейсінде 5 мың теңгеден еркін және ашық саудада сатылып жатыр.
"Бұл не сұмдық?! Бұған кім жол беріп отыр?", - деп атап өтті ол.
Депутаттың айтқан ұсыныстары:
- Құқық қорғау органдары арандатушылыққа алданған төрт әйелдің артында тұрған күштерді, жалған туды дайындаушыларды, оны таратушыларды анықтап, мұндай қастандықтың жолын кесу үшін, ұйымдастырушыларға қатаң жаза қолдануы тиіс.
- Бекітілген стандартқа сәйкес келмейтін, ресми сипаты бұрмаланған мемлекеттік рәмізді сатуға шығарған сауда орындарының басшылығын жауапқа тарту. Сатылып кеткен туларды жинап алып, жою.
Айта кету керек, осыған дейін Атырауда Қазақстанның туын қорлап, суретке түскендер ұсталғанын жазғанбыз. Үш азаматша кінәлі деп танылып, біреуі 15 тәулікке қамалды. Мәдениет министрлігі Wildberries пен Ozon-ның мемлекеттік туды сату кезінде заң бұзғанын айтты.
