Димаш Құдайберген "Singer 2017" ән байқауының шешуші кезеңінде Майкл Джексонның әнін орындайды, деп хабарлайды inform.kz.
Қытайдың Weibo әлеуметтік желісіндегі ақпаратқа сүйенсек, 12 сәуір күнгі дайындық барысында Димаш өзімен бірге ән шырқайтын қытайлық әріптесі Шаң Венжемен Майкл Джексонның "Dangerous" сияқты әлемдік хитке айналған бірнеше әнін қоса шырқаған.
Айта кетейік, байқауды ұйымдастырып отырған Хунань телеарнасының бас ғимаратына әншілердің үлкен суреттері ілініп, ақтық бәсекеге қызу дайындық жүріп жатыр.
Еске сала кетейік, Димаш "Singer" байқауындағы ерекше талантымен көзге түсіп, Қытайда ерекше танымалдылыққа ие болды. Жас талант 23 наурыз күні Шанхай қаласында 24-кезекті "China Top music Awards" шарасының "Азияның ең танымал әншісі" (Best Asia popularsinger) номинациясында, 9 сәуір күні Шэньчжэнь қаласында өткен "17th Top China Music Awards" шарасында "Халықаралық дәрежедегі танымал әнші" номинациясында марапатталды.
