Доллар индексі соңғы 12 айда рекордтық деңгейге жетті. Бұл туралы Қазақстан қаржыгерлер қауымдастығының шолуында айтылған, деп хабарлайды inbusiness.kz сайты.
KASE-де доллар Ұлттық Банктің валюталық интервенциялар жүргізуге дайындығы аясында үш күндік өсімді тоқтатты. Сәрсенбідегі сауда-саттық қорытындысына сәйкес валюта бағамы бір доллар үшін 492,22 теңгеге дейін төмендеді (-2,87 теңге).
Қазақстан қаржыгерлер қауымдастығы елде тоқсан сайынғы салық кезеңінің басталуы қарсаңында бірқатар нарық ойыншылары шетел валютасын сатудың тартымды бағамын пайдалана отырып, алдын ала айырбастай алатынын жоққа шығармайды. Сауда-саттықтың артуы аясында осындай болжам жасауға болады – 298,6 млн доллар (+45,1 млн).
Осы айда үшінші тоқсандағы бірқатар маңызды салықтар төленіп жатқаны да айтылды. 25 қарашада рента салығы, жер қойнауын пайдаланушының қосымша төлемдері, корпоративтік табыс салығы, тау-кен салығы және қосымша құн салығын төлеу мерзімі аяқталады.
14 қарашада USD/KZT бағамы бір доллар үшін 491,64 теңге деңгейінде саудаланады.
