Түркия Президенті Режеп Тайип Ердоған Түркі тілдес мемлекеттердің ынтымақтастық кеңесінің 8 - саммиті биыл 12 - қарашада Ыстанбұл қаласында ұйымдастырылатынын мәлімдеді, деп хабарлайды inbusiness.kz тілшісі.
"2016 жылғы қыркүйекте Қырғызстанның Шолпан ата қаласында Түркі кеңесінің 6-шы саммиті өткен болатын. Сол жиында 4-ші Дүниежүзілік көшпенділер ойынын Түркияда өткізу туралы шешім қабылдаған едік. Егер сіздер рұқсат етсеңіздер, бұл ойындарды мына коронавирус пандемиясына байланысты кейінге қалдырып, 2022 жылы өткізейік", – деді Режеп Тайип Ердоған.
Бұдан кейін Түркия басшысы Түркі кеңесіне мүше елдердің басшыларын Анталия дипломатиялық форумына, Түркі тілдес мемлекеттердің ынтымақтастық кеңесінің 8 - саммитіне шақырды.
"Анталия дипломатиялық форумы маусым айында өтеді. Форум түрлі салада пікір алмасу алаңы ретінде жұмыс істейді. Түркі кеңесінің 8 - саммитін 2021 жылғы 12 қарашада Ыстанбұлда өткіземіз деп үміттенемін", – деді Режеп Тайип Ердоған.
Қанат Махамбет
