Францияда ұсталған Telegram негізін қалаушы Павел Дуровты қамауда ұстау мерзімі жексенбі күні кешке ұзартылды. Бұл туралы жергілікті БАҚ тергеуге жақын дереккөзге сілтеме жасап хабарлайды, деп жазады inbusiness.kz сайты.
Олардың айтуынша, Дуровты ұстау ісін жүргізіп жатқан тергеуші судья жексенбі күні кешке оның қамауда өткізетін уақытын ұзартты. Францияда жауап алу үшін алғашқы ұстау кезеңі ең көбі 96 сағатқа созылуы мүмкін.
БАҚ-тың хабарлауынша, қамауда ұстаудың бастапқы кезеңі аяқталған кезде судья Дуровты босатуы немесе қамауға алу үшін оған айып тағуы мүмкін.
Сенбі күні кешке француз БАҚ Telegram негізін қалаушы Ле Бурже әуежайында ұсталғанын хабарлады. Ол Әзірбайжаннан келді деп мәлімделген жеке ұшақтан шыққан кезде ұсталды. Жергілікті баспасөздің хабарлауынша, француз азаматтығы бар Дуров елде іздеуде жүрген адамдардың тізімінде болған.
Жергілікті БАҚ мәліметтері бойынша, әділет органдары Дуровты бірқатар себептер бойынша, соның ішінде Telegram-ның Республика билігімен ынтымақтастықтан бас тартуына байланысты қылмыстарға қатысы бар деп санайды.
