Бұл туралы avesta.tj ТР Сыртқы істер министрлігінің баспасөз қызметіне сілтеме жасай отырып хабарлайды, деп жазады Inbusiness.kz.
Баспасөз қызметі хабарлағандай, келіссөздер 13-20 қаңтар аралығында өтті. Олардың қорытындысы бойынша тиісті Хаттамаға қол қойылды. Тараптардың кезекті кездесуі Қырғызстан аумағында өтеді.
Тәжік-қырғыз шекарасын делимитациялау мен демаркациялау бойынша Тәжікстан мен Қырғызстан үкіметтік делегацияларының топографиялық жұмыс топтары бұған дейін 2022 жылғы 1-6 желтоқсан аралығында Қырғызстандағы Баткенде кездесті. Содан кейін тараптар жалпы ұзындығы 17,66 шақырым болатын шекара сызығының өтуінің жобалық сипаттамасын орындады және 2023 жылға арналған кездесулердің жоспар-кестесін құрады.
Тәжікстан мен Қырғызстан арасындағы шекараның жалпы ұзындығы 970 шақырымға жуық. КСРО ыдырағаннан кейін оны демаркациялау процедуралары жүргізілмеген.
Қазіргі уақытта шекараның 460 шақырымы келісілмеген күйінде қалып отыр, ал бұл өз кезегінде екі жақтың шекаралас аудандарының тұрғындары арасындағы қақтығыстардың басты себебіне айналып отыр.
