ЭКСПО-2017 халықаралық көрмесі аясында ұйымдастырылатын дю Солей циркінің қойылымына билеттер 2017 жылдың 10 мамырынан бастап сатылып жатыр.
Штаб-пәтері Монреаль қаласында орналасқан дю Солей циркі қазіргі таңда ойын-сауық индустриясындағы алып компаниялардың біріне айналған. Цирк ұжымында әлемнің 50 елінен жиналған 4 мыңға жуық адам еңбек етеді, оның 1300-і – әртіс. Әлемге әйгілі дю Солей циркі осы уақытқа дейін 400-ден астам шаһарда өнер көрсетіп үлгерді. Енді олар ЭКСПО-2017 аясында алғаш рет Астанаға жол тартпақ.
Қазақстанның бай мәдениеті мен тарихынан және "Болашақ энергиясы" атты Көрме тақырыбынан шабыттанған цирк әртістері Астана тұрғындары мен қонақтарына арнайы эксклюзивті "REFLEKT" шоу-бағдарламасын дайындады.
Таңғажайып қойылымда қазақ халқының мәдени мұрасы мен болашаққа деген заманауи көзқарас өзара өріліп жатады. Жалпы, цирк 2017 жылдың 10 маусымынан 10 қыркүйегіне дейін 71 қойылым көрсетуді жоспарлап отыр. Цирк қонақтары бірегей шоуды арнайы жабдықталған үшбұрыш тәріздес павильонда тамашалай алады. Павильон 2 мың көрерменге шақталған. Қойылым тұсаукесері Көрме алаңында 16 маусымда өтеді.
Қазақстан тарихындағы алып шараның бір бөлшегі болып, дю Солей циркінің таңдай қақтырарлық қойылымының куәгері болу үшін 4000 теңгеден басталатын билетті сатып алу қажет.
