Жоғары Еуразиялық экономикалық кеңес отырысына қатысқан Ресей президенті Владимир Путин Еуразиялық экономикалық одақ елдеріндегі еңбек өтілі бірдей есептелетінін жеткізді. Ол үшін одаққа мүше елдер арасында арнайы келісім әзірленіп жатыр.
Яғни, азаматтардың Еуразиялық экономикалық одаққа мүше елдердің кез келгенінде жинақтаған еңбек өтілі зейнеткерлікке шыққанда есепке алынады. Бұл норма одаққа мүше бес мемлекеттің барлығына ортақ болмақ.
"Бұл барлық азаматтар үшін маңызды деп есептеймін. Яғни, олар одаққа мүше мемлекеттердің кез келгенінде жұмыс істей алады. Ал еңбек өтілі тиісті құжаттармен куәландырған жағдайда есепке алынады. Бұл құжат одақ тұрғындарының мүддесі мен құқығын толықтай қорғауға мүмкіндік береді", – деді Владимир Путин.
Фархат Әміренов
