Қазақстан Республикасы Премьер-Министрінің орынбасары Серік Жұманғарин бастаған Еуразиялық экономикалық комиссия кеңесінің 2024 жылғы бірінші отырысында ел үшін бірқатар өзекті мәселелер көтерілді, деп жазады inbusiness.kz сайты.
Жалпы, ЕАЭО кеңістігінде лицензиядан өтпеген сертификаттар үстемдігінің мәселесі өткір тұр. Сәйкестікті бағалау құжаттары көбінесе процедураларды бұза отырып немесе сынақсыз беріледі. Бұл контрафактілік өнімдердің көбеюіне және адам денсаулығына теріс әсер етуіне елеулі алғышарттар жасайды. 2022 жылы Қазақстанда басқа елдерде берілген 200 лицензиядан өтпеген сертификаттың күші жойылды, ал 2023 жылы және қазірдің өзінде олардың саны 300-ке жетті.
"Қазіргі жағдайдың ауқымы мен қаупін ескере отырып, ЕАЭО-ға мүше елдер бірлескен жүйелі шаралар қабылдау қажеттігі туралы келісті. Талқылау қорытындысы бойынша, ЕЭК Кеңесі Еуразиялық экономикалық одақ аумағында берілген 2023 жылға тоқтатылған сертификаттар туралы ақпаратты комиссияның қарауына жіберуді тапсырды. Ақпаратты талдау және ұсыныстар әзірлеу үшін жоғары деңгейдегі жұмыс тобы құрылады. Ұсыныстар 2024 жылдың мамыр айында өтетін ЕЭК кеңесінің отырысында ұсынылады", - делінген хабарламада.
Сондай-ақ, Қырғызстан 2024 жылдың соңына дейін еліміз үшін 300 мың тонна көлемінде шикі қамыс қантына тарифтік жеңілдіктің қолданылу мерзімін ұзарту мәселесін қолдамады. Осы ретте, ЕАЭО-дағы (РФ және Беларусь) қанттың негізгі өндірушілері қазақстандық сұранысты қолдады. Сонымен қатар, бұл мәселе ақпан айының басында ЕАЭО елдерінің үкімет басшылары деңгейінде қаралады.
"ЕЭК Кеңесінің қаңтардағы отырысы кезінде қабылданған шешімдерінің ішінде Еуразиялық экономикалық одақ шеңберінде навигациялық мөрге қамтылған ақпаратты қорғаудың бірыңғай шараларын қолдану жөніндегі іс-шаралар жоспарын бекіту бар. Құжат 2027 жылға дейінгі қадамдар кешенін қамтиды. Оның ішінде ықтимал бұзушының қауіптері мен әрекеттерінің жалпы моделін әзірлеу, ақпараттық қауіпсіздік, сондай-ақ криптографиялық қорғау және техникалық шешімдер саласындағы алгоритмдерді анықтау бар", - деп атап өтті Сауда министрлігі.
Естеріңізге сала кетейік, ЕАЭО аумағында тасымалдауды қадағалау үшін навигациялық мөрді пайдалану туралы келісім өткен жылы күшіне енген болатын. Бұл мөр автомобиль және теміржол көлігімен жүктерді тасымалдаудың тұтастығын бақылауды қамтамасыз етеді. Бұдан басқа, бұл механизм Еуразиялық экономикалық одақтағы бірыңғай кедендік транзит жүйесінің элементтерінің бірі болып табылады.
Айта кету керек, ЕЭК Кеңесі техникалық және кедендік реттеу, ақпараттық өзара іс-қимыл және т.б. салалардағы интеграциялық үдерістерді дамытуға бағытталған бірқатар басқа да шешімдер қабылдады.
