Қазақстандық аграршылар егін егу жұмыстары үшін 700 бірліктен аса техника сатып алды, деп хабарлайды "ҚазАгроҚаржы" АҚ баспасөз қызметі.
Бүгінгі таңда "ҚазАгро" ҰБХ" АҚ құрылымына енетін "ҚазАгроҚаржы" акционерлік қоғамына көктемгі-дала жұмыстарын жүргізу үшін жалпы сомасы 15 млрд. аса теңгеге ауыл шаруашылығы техникасын және жабдықтар сатып алуға 1269 өтінім түсті.
Аграршылармен жалпы сомасы 9,2 млрд. теңгеге 744 қаржы лизингі шарты жасалып қойған. Жасалған шарттардың шеңберінде фермерлер 463 трактор, 126 тұқым сепкіш, 13 егіс кешені және 142 бірлік өзге де техникаларды сатып алды.
Астана қаласындағы орталық офисқа 172 өтінім келіп түскен, Солтүстік Қазақстан облысындағы филиалға – 168, Шығыс Қазақстан облысындағы филиалға – 157, Алматы облысындағы филиалға - 142 өтінім түскен.
Сонымен бірге, отандық аграршылар егін жинау науқанына дайындық жөнінде де ұмытпаған. "ҚазАгроҚаржы" акционерлік қоғамына жалпы сомасы 13,8 млрд. теңгеге комбайндар, шөп машиналарын, дестелегіштер мен басқа да техникалар сатып алуға 637 өтінім түсті.
