Ақтау гарнизонының әскери қызметшілері тұрақты орналасу пунктіне оралды. Олар екі ай бойы Атырау облысындағы су тасқынына қарсы іс-шараларға қатысқан болатын, деп жазады inbusiness.kz сайты.
"Жеке өз атымнан және бүкіл әскери ұжымның атынан сіздерге зор алғысымды білдіремін. Табиғи апатпен күресте ешқандай қиындыққа қарамастан, берілген тапсырманы мүлтіксіз орындадыңыздар", – деді бригада командирі подполковник Азамат Сүлейменов.
Атқарылған жұмыстар жайында артиллериялық дивизионның штаб бастығы майор Марат Оразов егжей-тегжейлі айтып берді.
"Теңіз жаяу әскерлері екі ай бойы Махамбет ауданының Сарайшық, Есбол және Ақтоғай ауылдарын тасқын судан қорғауға қатысты. Олар бөгеттер салып, жергілікті тұрғындарды эвакуациялауға көмектесті. Әскери қызметшілердің күш-жігерінің арқасында көлемі 60 шақырым аумаққа жағалау бекіткіштері тұрғызылды. Бұл ретте күн сайын әскери қызметшілер 15 мың қапқа дейін құм толтырғанын атап өту керек", – деп нақтылады ол.
Іс-шара соңында ерекше көзге түскен әскери қызметшілер грамоталармен және бағалы сыйлықтармен марапатталды.
