ҚР Премьер-Министрінің бірінші орынбасары Роман Склярдың төрағалығымен өткен арнайы кеңесте жылу желілерінің бірқатар учаскелерін ауыстыру және ЖЭО-да жөндеу жұмыстарына дайындық мәселелері қаралды.
Сол күні Екібастұзға Энергетика, Индустрия және инфрақұрылымдық даму министрліктерінің, "ТКШ ҚазОрталығы" АҚ, Атом және энергетикалық қадағалау мен бақылау комитетінің өкілдері барды. Жөндеу барысымен танысқаннан кейін жұмыс тобының мүшелері әлеуметтік нысандар мен көп пәтерлі тұрғын үйлерге барды.
Бүгінгі таңда Екібастұз ЖЭО-да 5 қазандық – 2 энергетикалық және 3 су жылытатын қазандық жұмыс істейді. Тағы 5 қазандық жөнделіп жатыр. Сонымен қатар жылу желілеріндегі ақауларды жою жұмыстары тәулік бойына атқарылуда. Қазіргі уақытта квартал ішіндегі учаскелерде тіркелген 9 ақауды жөндеу жұмыстары жүріп жатыр.
Сонымен қатар Екібастұзда жылу беру температурасын реттеу жұмыстары жалғасуда. Нормативке сәйкес, ол 77/53оС (шығу кезінде) болуы керек, қазіргі кездегі нақты көрсеткіш – 64/45оС (шығу кезінде). Сонымен қатар сыртқы ауа температурасы -21оС-қа жетеді.
6 ақпанда жылытудың температуралық параметрлерінің төмендеуіне байланысты қала мектептерін қашықтан оқыту форматына көшіру туралы шешім қабылданды. Жұмыс аяқталғаннан кейін штаттық оқыту режимі қалпына келтірілмек.
Қалада қалыпты деңгейде жылу берілмей отырған 28 көп пәтерлі тұрғын үй бар. Осыған байланысты жылыту маусымы кезеңінде аталған үйлердің жылумен жабдықтау жүйелерін жөндеп, неғұрлым жоғары параметрлер бойынша жылу беру туралы шешім қабылданды. Жұмыстарды тиісті коммуналдық кәсіпорындар жүргізетін болады.
Сонымен қатар қалада жылыту маусымы аяқталғаннан кейін басталатын кең ауқымды жөндеу науқанына дайындық жүргізілуде. Бүгінгі таңда қалалық жылумен жабдықтау жүйелеріне техникалық аудит жүргізіліп жатыр, қорытындысы бойынша оны кешенді қалпына келтіру шаралары айқындалатын болады. Жалпы ұзындығы шамамен 5 км болатын төрт жылу торабын реконструкциялау үшін ЖСҚ дайыналып, қазір олар мемлекеттік сараптамадан өтіп жатыр. Сонымен қатар қаланың квартал ішіндегі 400 км желілерін жөндеуге есептер дайындалды.
Ауқымды жөндеу науқанын жүргізу және қаржыландыру көздерін айқындау үшін облыс әкімдігі мен "ОАЭК" АҚ арасында жауапкершілікті бөлісу бойынша меморандум жобасы әзірленді.
Тұтынушыларға жылу энергиясы үшін төлемді қайта есептеу үшін жылумен жабдықтау қызметтерінің құнын есептеудің жаңа алгоритмі жасалғанын атап өткен жөн.
Облыстағы жылыту маусымын өткізу барысы Үкіметтің бақылауында.
