Павлодар облыстық полиция департаменті пәтеріне бір келіден астам есірткіні жасырған 32 жасар тұрғынды құрықтады, деп хабарлайды inbusiness.kz тілшісі.
Күдіктінің пәтерін тексеру барысында 1 келі 90 грамм тыйым салынған зат табылды. Сараптама нәтижесінде белгілі болғандай, ол - a-PVP синтетикалық заты.
"Жедел тергеу-тексеру шаралары барысында ер адам өңірлік курьер қызметін атқарып, ірі партия боп келетін есірткіні дозаларға бөліп, кейін оны қаладағы жасырын орындар арқылы сатқаны белгілі болды. Тәркіленген бір келі зат – бес мыңнан астам доза", - дейді Павлодар облыстық полиция департаментінің бастығы Василий Скляр.
Екібастұздықпен қатар, спорт жаттықтырушылары да есірткі сатылымымен айналысқаны белгілі болды. Облыс орталығындағы фитнес-клубтардың бірінде жұмыс істейтін екі ер адам синтетикалық затты Екібастұз қаласына жеткізіп отырған. 29 және 19 жасар жігіттер фитнес-орталыққа келушілерді жаттықтырып қана қоймай, интернет-дүкендегі есірткі курьері қызметін атқарған. Олардан 99 грамм синтетикалық қоспа табылды.
Аталған фактілер бойынша Қылмыстық Кодекстің 297-бабы 3-бөліміне сәйкес сотқа дейінгі тергеу жұмыстары басталды.
Құндыз Қабылденова
