Биылғы 9 айда "ҚТЖ" ҰК" АҚ желісі бойынша тиеу 190 млн тоннаға жетті, деп хабарлайды inbusiness.kz компанияның баспасөз қызметіне сілтеме жасап.
Өткен жылдың сәйкес кезеңімен салыстырғанда көрсеткіш 1,5%-ға жоғары. Ішкі қатынаста – 123 млн тонна (+1%), экспортқа 66,6 млн тонна (+2,5%) тиелген.
"Қаңтар-қыркүйек айларында тас көмір тиеу 5,2%-ға өсіп, 76,6 млн тоннаны құрады. Қазақстандық тұтынушыларға 53,6 млн тоннадан астам қатты отын жеткізілді. Бұл көрсеткіш өткен жылдың сәйкес кезеңімен салыстырғанда 3,5%-ға өсті. Экспортқа 23 млн тонна жөнелтілді. Астық тиеу 6,4 млн тоннаны құраса, оның ішінде экспортқа 4,8 млн тоннасы жөнелтілген. Есепті кезеңде өткен жылға қарағанда мұнай өнімдерін тиеу 7,2%-ға (13 млн тоннаға дейін), темір кені мен марганецті тиеу – 3,2%-ға, яғни 20,8 млн тоннаға дейін өсіп отыр", – деп жазылған "ҚТЖ" таратқан хабарламада.
Сондай-ақ 11,9 млн тонна құрылыс жүктері, 3,6 млн тонна қара металдар, 2,9 млн тонна химиялық тыңайтқыштар, 16,8 млн тонна түсті кен мен күкірт шикізаты тасымалданған.
