Қоғамды дүр сілкіндірген оқиға Түркістан облысы Келес ауданында болған, деп хабарлайды inbusiness.kz сайты.
Жантүршігерлік ақпарат әуелі әлеуметтік желіде тарады. Онда қыздың туыстары ішіндегі баланы 7 айлық кезінде ғана байқағаны айтылған. Ақпан айында 15 жастағы қыз босанған, ал күдікті ретінде 71 жастағы көршісі ұсталған. Оның жақын туысы екені туралы да деректер бар.
Ата-анасының айтуынша, қыз өз басынан өткен ауыр жағдайды ешкімге айта алмаған.
Түркістан облысы Полиция департаменті күдіктінің қамауға алынып, уақытша ұстау изоляторына жеткізілгенін хабарлайды.
– Келес ауданында тұратын әйел кәмелетке толмаған қызына қатысты заңсыз әрекеттер жөнінде арызданған. Аталған факті бойынша қылмыстық іс қозғалды. Қазір барлық мән-жай анықталып жатыр. Тергеу қорытындысына сәйкес тиісті шешім қабылданады, – делінген полиция департаментінің хабарламасында.
Қылмыстық істің тергеу барысы облыстық Полиция департаменті басшылығының бақылауында екені айтылады.
ҚР ҚПК-нің 201-бабына сәйкес, өзге де ақпаратты жариялауға тыйым салынған.
