Қаржы министрі Мәди Такиев тоғыз айда мемлекеттік бюджет кірісі 17,3 трлн теңгеге жеткенін айтты, деп хабарлайды inbusiness.kz сайты.
"Мемлекеттік бюджеттің кірістер көлемі 17,3 трлн теңгені құрап, жоспар 102% орындалды. Өткен жылмен салыстырғанда, өсу қарқыны 116% жетіп, 2,4 трлн теңгені құрады. Оның ішінде республикалық бюджеттің түсім көлемі 10,5 трлн теңгені құрап, жоспар 97,3% орындалды. Өсім қарқыны өткен жылмен салыстырғанда шамамен 1,4 трлн теңгеге немесе 116% жетті", – деді Мәди Такиев Үкімет отырысында.
Ведомство басшысы жоспардың орындалмауына әсер еткен негізгі факторларды атады. Біріншісі – әлемдік мұнай бағасының құбылмалылығы. Екіншісі – бизнестің логистикалық шығыстарына әсер ететін, тұрақсыз геосаяси жағдайдың жалғасуы.
"Бұл өз кезегінде экспорт көлемінің 5,1% төмендеуінде және салдарынан, бизнестен түсетін салық түсімдерінің азаюына әкелді. Жергілікті бюджет кірістері көлемі, сыртқы факторларға тәуелсіз салықтар есебінен 6,8 трлн теңгені құрады. Жоспар 704 млрд теңгеге артығымен орындалды. Салық және кедендік әкімшілендіру шеңберінде, 653 млрд теңгеге қосымша резервтер қамтамасыз етілді", – деді министр.
Айта кету керек, бұған дейін Қазақстан экономикасы 6,3%-ға өскенін жазғанбыз.
