Экология және табиғи ресурстар министрі Ерлан Нысанбаев Үкімет отырысында жасаған баяндамасында @TazaQazBot Телеграм ботына келетін өтініштерге тоқталды, деп хабарлайды inbusiness.kz сайты.
Министр 2024 жылы маусым айында @TazaQazBot өтініштерді қабылдау сервисі іске қосылғанын еске салды.
"Чат-бот ел тұрғындары арасына кеңінен таралған. 2025 жылғы 16 қаңтардағы жағдайды алсақ, барлығы 10 700-ге жуық өтініш түсіп, оның 9 700-ден астамы орындалды. Өтініштердің көбі "Аумақтарды тазалау" (29%), "Көшелерді абаттандыру", "Тұрмыстық қалдықтарды шығару" және "Жолдарды жөндеу" (10%) санаттары бойынша түскен. Өңірлер бөлінісінде ең көп өтініш Алматы (29%), Астана (12%) қалаларынан және Түркістан облысынан (9%) түсті", – деді Ерлан Нысанбаев.
Пайдаланушыларға қолайлы болу үшін және жауапты орындаушыларды бекіту мақсатында Телеграм ботта 17 санат айқындалған.
