ҚР Үкіметі мен ҚР Ұлттық банкі жүргізіліп жатқан макроэкономикалық саясатты жалғастыратыны туралы мәлімдеме жасады, деп хабарлайды primeminister.kz.
"Үкімет пен Ұлттық банк халықтың әл-ауқатын арттыру, экономикалық өсімді ұлғайту, инфляциялық үрдістерді төмендету және қаржы нарығының тұрақтылығын қамтамасыз ету бойынша жүргізіліп отырған саясат сақталатыны туралы мәлімдейді. Үкімет пен Ұлттық банк Қазақстан Республикасының Тұңғыш Президенті – Елбасының бұрын берген тапсырмалары мен жариялаған бастамаларын орындайтын болады", – делінген мәлімдемеде.
Сондай-ақ, мемлекеттік бағдарламалар мен құрылымдық реформаларды іске асыру жалғаса беретіні айтылған.
Биыл экономика өсімі 3,8%-дан төмен емес деңгейде, ал инфляция 4-6% дәлізінде күтіліп отыр.
Үкімет макроэкономикалық тұрақтылықты қамтамасыз етуге бағытталған тұрақты болжамды қазынашылық саясатты жүргізуін жалғастыра береді. Барлық бюджеттік міндеттемелер және әлеуметтік бастамалар толық көлемде орындалатын болады. Әсіресе, әлеуметтік маңызы бар тауарлар мен қызметтер бағасының негізсіз өсуіне жол бермеуге ерекше көңіл бөлінетін болады.
Ұлттық банк төмен инфляцияны қолдауға бағытталған болжамды ақшалай-несие саясатын жүргізуін жалғастыра береді. Валюта нарығында, банк секторында және қаржы нарығының басқа сегменттерінде жағдайдың тұрақтылығын қамтамасыз ету үшін барлық қажетті шаралар қабылданатын болады. Ұлттық банктің жеткілікті көлемде алтын-валюталық активтері, сондай-ақ теңгенің айырбас бағамына қатысты алыпсатарлық операциялардың алдын алу үшін қажетті құралдары, оның ішінде реттеу құралдары да бар.
"Ағымдағы экономикалық ішкі және сыртқы факторлар ел экономикасының тұрақты дамуына ықпал етеді. Жағымсыз тәуекелдер көрініс берген жағдайда үкімет пен Ұлттық Банк олардың салдарын барынша азайту және Қазақстан Республикасының әлеуметтік-экономикалық дамуының тұрақтылығын қамтамасыз ету үшін қажетті ресурстарға ие", – делінген үкімет пен банк мәлімдемесінде.
