Өнеркәсіп және құрылыс министрі Ерсайын Нағаспаев қала халқының 99,3%-ы және ауыл тұрғындарының 97,5%-ы ауыз сумен қамтамасыз етілгенін айтты, деп хабарлайды inbusiness.kz сайты.
"Мемлекет басшысының тапсырмасына сәйкес жыл соңына дейін барлық елді мекендерді 100% ауыз сумен қамтамасыз ету міндеті қойылған болатын. Бүгінде қала халқының 99,3%-ы және ауыл тұрғындарының 97,5%-ы ауыз сумен қамтамасыз етілген. 10 өңірде бұл көрсеткіш 100%-ға жетті. Бұлар – Алматы, Ақтөбе, Атырау, Батыс Қазақстан, Қызылорда, Маңғыстау, Солтүстік Қазақстан, Түркістан, Жетісу және Ұлытау облыстарының қалалары мен Маңғыстау облысының ауылдары", – деді министр Үкімет отырысында.
Ерсайын Нағаспаев елдегі 90 қаланың 73-і 100% ауыз сумен қамтамасыз етілгенін, қалған 17 қала жыл соңына дейін сумен толық қамтылатынын айтты.
"Еліміздегі 6 148 ауылдың 5 679-ы су құрылғыларымен жабдықталған. Оның ішінде, 4 420 ауылдық елді мекен орталық сумен жабдықтау жүйесіне қосылып, 1000-ға жуығында кешенді блок-модульдер орнатылған. 260 шағын ауылдық елді мекен құдық суын пайдаланады. Ал, кейбір алыс ауылдарға су, тасымалдау арқылы жеткізіледі. Қазірде қалған 469 ауылдың 245-і республикалық бюджет пен арнайы мемлекеттік қор қаражат есебінен орталық су тарту жүйелеріне қосылуда. 224-іне жергілікті бюджет есебінен кешенді блок-модульдер орнатылатын болады", – деді Ерсайын Нағаспаев.
