Премьер-Министр Әлихан Смайыловтың айтуына қарағанда, бүгінде мемлекеттік және квазимемлекеттік секторлар мен жер қойнауын пайдаланып отырған компаниялардың елімізде шығатын тауарлар мен жұмыстарды, қызметтерді сатып алу үлесі – 52%. Соның ішінде қазақстандық қамтудың нақты үлесі 40%-дан аспайды.
Бұдан бөлек, өткен жылы импорт шамамен 8%-ға өскен. Импорттың басым бөлігі қосылған құны жоғары өнімдер болса, экспорттың дені – негізінен өңделмеген өнімдер.
"Бәсекеге қабілетті экономика құрамыз десек, біз осы бір үрдісті түбірімен өзгертуіміз керек. Бұл жерде нарықты отандық өнімдермен қамтамасыз ету арқылы импортты алмастыру саясаты оң ықпал етуі тиіс", – деді Үкімет басшысы Әлихан Смайылов бүгінгі үкімет отырысында.
Оның айтуына қарағанда, мемлекет басшысының тапсырмасы бойынша, Импортты алмастырудың 2025 жылға дейінгі бағдарламасы дайындалып жатыр. Бағдарлама аясында қазақстандық қамту үлесін 60%-ға дейін жеткізу жоспарланған.
"Ең бастысы, бұл жаңа өндірістердің дамуына серпін беріп, 116 мың жаңа жұмыс орнын құруға мүмкіндік береді. Сондай-ақ ірі инвестициялық жобаларды іске асыратын компаниялардың айналасында шағын және орта кәсіпорындардың белдеуі құрылып, олар өндірістің дамуына мультипликативтік әсер береді. Бұл өз кезегінде, өңірлердің әлеуметтік-экономикалық дамуына оң ықпал етеді. Импорттың орнын алмастыру үшін шығарылатын өнім бәсекеге қабілетті және сапасы жоғары болуы тиіс", – дейді премьер-министр
Тасқын Болатұлы
