Қазақстанда берілетін параның орташа көлемі 94 мыңнан 61 мыңға дейін түсті. Дегенмен жемқорлықпен бетпе-бет келген кәсіпкерлер саны артпаса, азаяр емес.
"Атамекен" Ұлттық кәсіпкерлер палатасының бизнес ортада жүргізген зерттеуіне сәйкес, жемқорлық фактілері 45 пайыздан 57 пайызға жетіпті. Кәсіпкерлер арасында жүргізілген сауалнама, сондай-ақ, параның қай салада тым көп екені де анықталған. Ең үлкен көрсеткішпен 17%-ды құрап, сумен қамту секторы тұрса, 14 пайызы - шаруа қожалықтарында, тағы - 14% жарнама мен типографиялық қызметте екен. 13% - жылжымайтын мүлік саласында тіркелсе, 12% - көлік және логистика секторында болған.
Ал жемқорлық етек жайған өңірлер көшін - Жамбыл мен Маңғыстау облыстары бастайды. Солтүстік Қазақстанда парақорлар аз екен. Тіркелген жағдайлардың 54 пайызында пара беруге мемлекеттік қызметкер түрткі болса, 41-інде кәсіпкердің өзі ұсыныпты.
