Қазіргі таңда республика бойынша 10 мектепте әжетхана сыртта орналасқан. Бұл туралы Оқу-ағарту министрі Ғани Бейсембаев айтты, деп хабарлайды inbusiness.kz сайты.
Тілші ведомство басшысынан "Қазақстан бойынша қанша мектептің әжетханасы сыртта орналасқан?" деп сұрады.
"2021 жылы осы мәселе көтерілген кезде мектептің сыртындағы дәретханалардың 2700-ді құраған екен. Бүгінгі таңда 10 әжетхана әлі де сыртта орналасқаны белгілі болды. Бұдан бөлек мектептің ішіндегі жылы әжетханалар болғанына қарамастан, сырттағы дәретханалар толыққанды алып тасталмаған. Бұл бағытта жергілікті атқарушы органдарына тиісті тапсырма берілді. Бұл әжетханаларды түгел алып тастау үшін мектептегі жылы әжетханалардың санын тиісті көрсеткішке жеткізу керек. Осы жазғы үш айда бұл мәселені толыққанды шешуге қатысты тапсырма берілді. Дейтұрғанмен, 10-20 бала ғана оқитын мектептер бар. Ол мектептерде ішкі әжетхананы қалыптастыруға қажетті шешілмеген мәселенің түйінін биыл толыққанды шешілу тапсырылып отыр", - деді Оқу-ағарту министрі.
Оның сөзінше, жаңа оқу жылынан бастап мектеп сыртындағы дәретханалар болмауы тиіс.
"Бұл баяғыда қабылданған шешім, ол талап етіліп келе жатыр. Тапсырманың қаншалықты сапалы орындалып жатқаны бойынша оқу жылының аяқталуына байланысты тексерулер жүргізетін боламыз. Оның нәтижесі бойынша қосымша шаралар қабылданады", - деді Ғани Бейсембаев.
