Елімізде 1,8 млн адам тұмауға қарсы вакцина алды

574

Республика халқының 9,5 пайызы тұмауға қарсы вакцина алды. Бұл туралы Денсаулық сақтау министрлігі санитариялық-эпидемиологиялық бақылау комитеті жұқпалы ауруларды эпидемиологиялық қадағалау басқармасының басшысы Роза Қожапова мәлімдеді, деп хабарлайды inbusiness.kz.    

Елімізде 1,8 млн адам тұмауға қарсы вакцина алды Фото: vlast.kz

"Қазан айынан бастап тұмауға қарсы жаппай вакцина егу жүріп жатыр. Еліміз бойынша тұмауға қарсы 1 806 710 адам вакцина алды. Бұл – республика халқының 9,5%. Атап айтсақ, тұмауға қарсы вакцинаны жергілікті бюджет қаражатынан 1 758 875 адам (97,3%), жұмыс берушілер есебінен 28 295 адам (1,6%) және ақылы негізде 19 540 адам (1,1%) салдырды. Вакцина алғандар арасында 14 жасқа дейінгі балалардың саны – 392 076 (21,2%), ал ересек адамдар – 1 423 287 (78,8%)", - деді Роза Қожапова Орталық коммуникациялар қызметі алаңында өткен баспасөз мәслихатында.

Оның айтуынша, тұмауға қарсы вакцинациядан кейін асқыну жағдайы тіркелген жоқ.

Сондай-ақ, маман аурудың алдын алу үшін келесі профилактика шараларын сақтауды ұсынды:

- адамдар көп жиналатын орындарға, әсіресе жабық бөлмелерге баруды шектеу;

- бөлмелерді желдету, антисептикалық құралдарды пайдаланып, дезинфекциялық режимді күшейту;

- қолды өңдеу үшін антисептиктерді немесе дезинфекциялық сулықтарды пайдалану;

- науқас адамдармен байланысты шектеу, оларды оқшаулау;

- ауырғандардың 80%-ы балалар екенін ескере отырып, тұмау мен ЖРВИ белгілері пайда болған кезде балаларды үйде қалдырып, ұйымдасқан ұжымдарға (мектепке дейінгі ұйымдарға, мектептерге) жібермеу керек;

- медициналық көмекке уақтылы жүгіну керек.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу